इचलकरंजी – बांधकाम सुरु असताना शेजारील घराची भिंत पडून ढिगाऱ्याखाली सापडून पाचजण जखमी झाले. तसेच प्रापंचिक साहित्याचेही मोठ्या प्रमाणात नुकसान झाले आहे. ही घटना शनिवारी पहाटेच्या सुमारास घडली. या घटनेस जबाबदार बांधकाम मालक नानासो शिवाजी वायदंडे (वय ५९ रा. लालनगर) यांच्यावर शहापूर पोलिसात गुन्हा दाखल करण्यात आला आहे. या प्रकरणी जमीर शाहबुद्दीन गोलंदाज (वय ४४ रा. सहारा निवारा कॉलनी) यांनी फिर्याद दिली आहे.
याबाबत पोलिसांतून मिळालेली माहिती अशी, जमीर गोलंदाज हे सेंट्रीग कामगार असून ते सहारा निवारा कॉलनीत भाड्याच्या घरात राहण्यास आहेत. त्यांच्या घरालगतच नान्नासो वायदंडे यांचे मालकीचे आरसीसी बांधकाम सुरु आहे. या बांधकामासाठी पिलरचे खड्डे आणि कुपनलिका खोदताना गोलंदाज यांच्या घराची भिंत खिळिखळी झाली होती. याबाबत वारंवार सांगुनही वायदंडे दुर्लक्ष करत होते. जमीर गोलंदाज, त्यांच्या पत्नी जबीन गोलंदाज, मुलगा अमन, मुली आलिया व आलिशा तसेच शाहबुद्दीन गोलंदाज हे गाढ झोपेत असताना शनिवारी पहाटे ५ वाजण्याच्या सुमारास गोलंदाज राहण्यास असलेल्या घराची भिंत अचानकपणे कोसळली.
गोलंदाज कुटुंबियांचा आरडाओरडा ऐकुन शेजारील नागरीक जागे झाले. त्यांनी मदतकार्य राबवुन सर्वांना ढिगाऱ्याखालून बाहेर काढून जखमींना आयजीएम रुग्णालयात दाखल केले. तर घरातील टिव्ही, फ्रीज, कपाट व प्रापंचित साहित्याचे जवळपास ५० हजार रुपयांचे नुकसान झाले. या घटनेस कारणीभूत नानासो वायदंडे यांच्यावर जमीर गोलंदाज यांच्या फिर्यादीवरून गुन्हा दाखल करण्यात आला आहे.
