इचलकरंजी : सांगली रोडवरील हॉटेल राज कॅसल समोर झालेल्या अपघातात एस.टी.च्या मागील चाकाखाली सापडून दुचाकीस्वार विजयकुमार बाळासो चौगुले (वय 60 रा. यड्राव) हे जागीच ठार झाले. ते शिक्षक होते. सकाळी आठ वाजण्याच्या दरम्यान हा अपघात झाला. या अपघाताची नोंद गावभाग पोलिस ठाण्यात झाली आहे. या प्रकरणी राजश्री विजयकुमार चौगुले (वय 55) यांनी फिर्याद दिली असून एस.टी.चालक पुंडलिक सदाशिव कुंभार (वय 47 रा. कुंभारवाडा बोरवडे) यांच्याविरुध्द गुन्हा नोंद करण्यात आला आहे.
याबाबत घटनास्थळ व पोलिसांतून मिळालेली माहिती अशी, सांगली रोडवरुन इचलकरंजीच्या दिशेने सकाळच्या सुमारास एस.टी. (क्र. एमएच 07 सी 9197) येत होती. त्याचवेळी विजयकुमार चौगुले हे आपल्या दुचाकी (क्र. एमएच 09 इ 8302) वरुन त्याच मार्गाने येत होते. ते एस.टी. ला ओव्हरटेक करुन पुढे जात असताना अचानकपणे त्यांची दुचाकी अडखळली आणि ते गाडीसह रस्त्यावर पडले. त्याचवेळी तेथून निघालेल्या एस.टी.चे मागील चाक त्यांच्या डोक्यावरुन गेल्याने चौगुले जागीच ठार झाले.
घटनेची माहिती मिळताच गावभाग पोलिसांना त्वरित धाव घेत पंचनामा केला. या अपघाताची नोंद गावभाग पोलीस ठाण्यात झाली आहे.